好多人問我到底喺法羅群島有咩做，搵工未。老實說，我暫時仲做緊廢青，每日起身都係去行下超市或者行下山。但其實黎之前兩個禮拜左右，我突然有個idea，就係喺法羅群島賣。雞。蛋。仔！
法羅群島的餐廳唔多，亞洲餐廳更加少之又少，全個國家應該得一間日本餐廳同兩間中國餐廳。順便同大家介紹下間日本餐廳，叫Etika Sushi。 幾好食，如果大家有機會黎法羅群島可以去試下，刺身好新鮮，仲可以試下佢的鯊魚刺身。 至於間中國餐廳叫「柒」聽個名都知咩事，所以唔推薦畀大家啦😂
而點解會有賣雞蛋仔呢個idea呢？之前我喺法羅群島見過有人係自己間屋前面賣一塊pancake+1杯咖啡盛惠60蚊港紙，又真係有人買喎。又話說有朋友即將開餅店，於是我陪佢去上海街買工具的時候發現原來一部雞蛋仔機都係幾舊水，我就諗🤔買部去法羅群島都好喎，話唔定可以做雞蛋仔大王，或者唔賣都可以自己食。就係一時的衝動，我買左部6公斤佔左我一半行李箱位置的雞蛋仔機。我份人係超級三分鐘熱度，其實當我買完部機之後，已經有少少後悔。帶埋部機去法羅群島之後簡直覺得自己戇居。於是久久都鼓唔起勇氣去整雞蛋仔。但係大地之子聽完我呢個虛無縹緲的雞蛋仔大計之後好支持我，喺我默默地唔出聲諗住大家靜靜咁遺忘呢個計劃的時候，佢話：「不如而家去買材料整啦！」
就係咁，我地開始左整雞蛋仔。但係我地兩個都無整餅經驗，第一次整出黎的雞蛋仔簡直不堪入目🤦🏻♀️我地試過唔同食譜，有d整出黎太甜，有d就太淡。溫度我地亦未掌握到，有時整出黎太燶，有時就唔熟，有時顏色唔均勻。每次我都諗不如算啦，部機又唔貴，唔想再整，但係大地之子都會好positive 咁話：「我覺得今次我地會整出perfect 的雞蛋仔。」雖然我地仲未整到perfect,但係都有進步☺️ 而家我覺開唔開得成雞蛋仔店已經唔重要，重要的係一齊努力咁去做一樣野的感覺真好👍🏻
最後，想問有無民間高手有整雞蛋仔經驗可以過兩招？有無食譜呀？歡迎分享，感謝❤️
Search